Popcorn

Се разделивме со мојата сенка. Сфативме дека имаме непомирливи разлики. Таа сакаше да се сонча спружена на асфалтот, а јас сакав да се кријам во шуплините на сопствената празнина. Ако некогаш се сретнеме на улица, таа можеби ќе сака пак да ме следи во чекор, но јас сум си ебал мајката – ќе застанам под некоја стреа и курнаски ќе чекам да си замине. Таков беше планот, но, таа не се појави никогаш. Оттогаш чекорам со наведната глава. Ја барам. Еднаш, по еден пороен дожд, ми се причини дека ја здогледав во едно вирче. Помислив дека можеби се удавила во локвата. Се доближив внимателно. Погледнав надолу, но тоа не беше таа, тоа беше само нејзината сенка. Тоа бев јас.